హైదరాబాద్ నగర శివార్లలో గడువు ముగిసిన ముడిసరుకులు, ప్రమాదకర రసాయనాలతో కల్తీ స్వీట్లు తయారు చేస్తున్న ముఠా గుట్టును సైబరాబాద్ టాస్క్ఫోర్స్ పోలీసులు రట్టు చేశారు. రంగారెడ్డి జిల్లా ఆదిబట్ల మున్సిపాలిటీ పరిధిలోని బొంగుళూరు గ్రామంలో ఉన్న 'M/s KSM ఫుడ్ ప్రోడక్ట్స్' తయారీ కేంద్రంపై పోలీసులు ఆకస్మిక దాడి నిర్వహించారు. ఈ సోదాల్లో సుమారు రూ.4.07 లక్షల విలువైన కల్తీ ఆహార పదార్థాలు, నిషేధిత ముడిసరుకులను అధికారులు స్వాధీనం చేసుకున్నారు.
పోలీసుల వివరాల ప్రకారం.. కేఎస్ఎం ఫుడ్ ప్రోడక్ట్స్ యజమాని మహ్మద్ ఖాలీద్, మేనేజర్ సంతోష్ కుమార్ సులభంగా డబ్బు సంపాదించాలనే దురాశతో ప్రజల ఆరోగ్యంతో చెలగాటమాడుతున్నారు. మార్కెట్లో గడువు ముగిసిన ముడిసరుకులు, లేబుళ్లు లేని రసాయన సువాసన ద్రవ్యాలు (ఫ్లేవర్లు) వినియోగిస్తూ, అత్యంత అపరిశుభ్ర వాతావరణంలో ఆహార పదార్థాలను తయారు చేస్తున్నారు.
టాస్క్ఫోర్స్ దాడిలో రూ.2.26 లక్షల విలువైన 1,560 జార్ల సోన్ పాపిడి, కాటన్ సోన్ పాపిడి, రూ.34,800 విలువైన 240 జార్ల పల్లి పట్టీలను సీజ్ చేశారు. వీటితో పాటు ఎలాంటి లేబుళ్లు లేని డైరీ మిల్క్, బనానా, బటర్ ఫ్లేవర్లు, కోకో పౌడర్, 670 కిలోల బెల్లం, ఎక్స్పైరీ అయిన డ్రైఫ్రూట్స్, కొబ్బరి పొడి, 72 బస్తాల మైదా పిండిని అధికారులు స్వాధీనం చేసుకున్నారు. పట్టుబడిన నిందితులతో పాటు సరుకును తదుపరి చర్యల నిమిత్తం ఫుడ్ సేఫ్టీ అధికారులకు అప్పగించారు.
నిందితులపై ఆదిబట్ల పోలీస్ స్టేషన్లో భారతీయ న్యాయ సంహిత (BNS) సెక్షన్లు 275, 318(4) కింద కేసు నమోదు చేసి దర్యాప్తు చేస్తున్నారు. ప్యాక్ చేసిన ఆహార పదార్థాలను కొనుగోలు చేసే సమయంలో వినియోగదారులు అప్రమత్తంగా ఉండాలని పోలీసులు సూచించారు.
తయారీ తేదీ, ఎక్స్పైరీ లేదా బెస్ట్ బిఫోర్ తేదీ, బ్యాచ్ నంబర్, ఎఫ్ఎస్ఎస్ఏఐ (FSSAI) లైసెన్స్ వివరాలను తప్పనిసరిగా తనిఖీ చేసుకోవాలని స్పష్టం చేశారు. ఎక్కడైనా కల్తీ ఆహార పదార్థాల తయారీ లేదా విక్రయాలు జరుగుతున్నట్లు అనుమానం వస్తే వెంటనే పోలీసులకు లేదా ఆహార భద్రతా అధికారులకు సమాచారం అందించాలని విజ్ఞప్తి చేశారు.
