వైద్య విద్యార్థిని ప్రియాంక కేసులో కీలక అప్‌డేట్: నిందితులపై కఠిన సెక్షన్లు పెట్టాలని తండ్రి కోరుతూ ఫిర్యాదు

రాజమహేంద్రవరంలో సంచలనం సృష్టించిన వైద్య విద్యార్థిని ప్రియాంక కారు ఢీకొన్న ఘటనలో దర్యాప్తు వేగవంతమైంది. మద్యం మత్తులో యువకులు అతివేగంగా కారు నడిపి, తమ కుమార్తెపైకి ఎక్కించి హత్యాయత్నానికి పాల్పడ్డారని బాధితురాలి తండ్రి వెంకటేష్ ఆరోపించారు. ఈ ఘటనపై ఆయన రాజమహేంద్రవరం ప్రకాశ్‌నగర్ పోలీస్ స్టేషన్‌లో అధికారికంగా ఫిర్యాదు అందజేశారు.

ఈనెల 3వ తేదీ రాత్రి నిందితులు సూరావరపు దస్వంత్, ఆండ్రూ జోసఫ్ అడ్వర్డ్స్ మద్యం మత్తులో ర్యాష్ డ్రైవింగ్ చేస్తూ ప్రియాంక స్కూటీని మూడుసార్లు బలవంతంగా ఢీకొట్టారని ఫిర్యాదులో పేర్కొన్నారు. ప్రస్తుతం పోలీసులు నమోదు చేసిన సెక్షన్లు తక్కువ తీవ్రతతో ఉన్నాయని, నిందితులకు కఠిన శిక్ష పడేలా సెక్షన్లను సవరించాలని ఆయన పోలీసులను కోరారు.

ఈ నేపథ్యంలో జిల్లా అదనపు ఎస్పీ పాటిల్, డీఎస్పీ సుభాష్‌లు ఫిర్యాదుదారుతో స్వయంగా మాట్లాడి దర్యాప్తు వివరాలను చర్చించారు. అనంతరం మీడియాతో మాట్లాడిన వెంకటేష్, సికింద్రాబాద్ కిమ్స్ ఆసుపత్రిలో వెంటిలేటర్‌పై చికిత్స పొందుతున్న తన కుమార్తె ప్రియాంక ఆరోగ్య పరిస్థితి అత్యంత విషమంగా ఉందని ఆవేదన వ్యక్తం చేశారు.

నిందితులు ఉద్దేశపూర్వకంగానే కారు తలపైకి ఎక్కించడంతో ఆమె అవయవాలు క్రమంగా చెడిపోతున్నాయని కన్నీటిపర్యేతమయ్యారు. అయితే, పోలీసులు ఇప్పటివరకు చేపట్టిన దర్యాప్తు తీరుపై తమకు పూర్తి నమ్మకం ఉందని, ప్రతి అంశాన్ని ఆధారాలతో సహా వారు వివరించారని తెలిపారు. చట్టం తన పని తాను చేస్తుందని, తమకు న్యాయం జరుగుతుందనే గట్టి నమ్మకం ఉందని వెంకటేష్ పేర్కొన్నారు.