బిచ్చగాడి ఒక్కరోజు సంపాదన రూ.4,000 పైనే.. నెటిజన్ల మైండ్ బ్లాంక్!

ప్రముఖ సినిమా ‘బిచ్చగాడు’లో కథానాయకుడు యాచకుడి అవతారంలో నటించి భిక్షాటన ఎంత కష్టంతో కూడుకున్నదో, ఎన్ని అవమానాలు ఎదురవుతాయో కళ్లకు కట్టినట్లు చూపించాడు. అచ్చం అలాంటి ప్రయోగమే చేసి ఓ యూట్యూబర్ వినూత్న అనుభవాన్ని గడించారు. రద్దీగా ఉండే ప్రాంతాల్లో యాచకులు ఒక్క రోజులో ఎంత సంపాదిస్తారనే ఆసక్తికర విషయాన్ని తెలుసుకోవడానికి ఆయన చేసిన ఈ ప్రయత్నం ప్రస్తుతం సామాజిక మాధ్యమాల్లో వైరల్‌గా మారింది.

యూట్యూబర్ పురుషోత్తమ్ వశిష్ఠ్, తన స్నేహితుడు సచిన్‌తో కలిసి ఈ సాహసోపేత ప్రయోగానికి తెరలేపారు. ఇందులో భాగంగా సచిన్ చిరిగిన దుస్తులు ధరించి, ముఖానికి నల్లటి రంగు పూసుకుని చేతిలో ఓ పాత పాత్ర పట్టుకున్నారు. అంతేకాకుండా, డిజిటల్ యుగానికి తగ్గట్టుగా మెడలో క్యూఆర్‌ కోడ్‌ బోర్డును వేసుకుని ఉత్తరాఖండ్‌లోని ప్రసిద్ధ పుణ్యక్షేత్రమైన హరిద్వార్‌ వీధుల్లో యాచన ప్రారంభించారు.

 అక్కడకు వచ్చే యాత్రికులు, దుకాణ యజమానులను కలిసి భిక్షం అడగడం మొదలుపెట్టారు. మొదట ఈ ప్రయోగం చేస్తున్నప్పుడు రోజంతా తిరిగితే మహా అయితే రూ.2 వేల వరకు రావచ్చని వారు భావించారు. కానీ, సాయంత్రం లెక్కించి చూసేసరికి ఏకంగా రూ.4 వేలు వసూలు కావడం వారినిస్మితాశ్చర్యానికి గురిచేసింది. అయితే, పెద్ద మొత్తంలో నగదు చేతికి వచ్చినప్పటికీ భిక్షాటన చేయడం ఎంత నరకప్రాయంగా ఉంటుందో సచిన్ తన అనుభవాలను పంచుకుంటూ వివరించారు.

 తీవ్రమైన ఎండలో తిరగడం, పక్కనుంచి వెళ్లే జనం చేసే చులకన చూపులు, చీదరింపులు తీవ్రమైన మానసిక వేదనను కలిగిస్తాయని ఆయన ఆవేదన వ్యక్తం చేశారు. కొందరు చిల్లర లేవంటూ విసుక్కోగా, మరికొందరు మాత్రం సానుభూతితో తోచిన సాయం అందించారని తెలిపారు. ఈ అనుభవం ద్వారా ఇతరులపై ఆధారపడకుండా సొంత కష్టంతో శ్రమించి బతకడమే గొప్పదనే చక్కటి సందేశాన్ని ఆయన ఇచ్చారు.

ఈ ప్రయాణంలో ఓ నిజమైన బిచ్చగాడిని పేరు అడిగితే.. తనకు ఊరు, పేర్లు కూడా గుర్తులేవని చెప్పడం తమను ఎంతగానో కలచివేసిందని వారు పేర్కొన్నారు. ప్రస్తుతం ఈ వీడియో నెట్టింట తెగ హల్‌చల్ చేస్తోంది.