తెలంగాణలో భారీ పోలీస్‌ ఉద్యోగాల భర్తీకి నోటిఫికేషన్‌ విడుదల.. 7,112 పోస్టుల వివరాలు ఇవే!

తెలంగాణలో పోలీస్‌, ఫైర్‌, జైళ్ల శాఖల్లో ఉద్యోగాల కోసం ఎంతోకాలంగా ఎదురుచూస్తున్న నిరుద్యోగులకు రాష్ట్ర ప్రభుత్వం గుడ్‌న్యూస్‌ చెప్పింది. తెలంగాణ స్టేట్‌ లెవల్‌ పోలీస్‌ రిక్రూట్‌మెంట్‌ బోర్డు (TSLPRB) రాష్ట్రవ్యాప్తంగా వివిధ విభాగాల్లో మొత్తం 7,112 పోస్టుల భర్తీకి అధికారిక నోటిఫికేషన్‌ను విడుదల చేసింది. అర్హత గల అభ్యర్థుల నుంచి ఆన్‌లైన్ ద్వారా దరఖాస్తులను స్వీకరించనున్నట్లు బోర్డు స్పష్టం చేసింది.

 ఈ నోటిఫికేషన్ ద్వారా భర్తీ చేయనున్న ఖాళీలలో పోలీస్‌ కానిస్టేబుల్‌ సివిల్‌ పోస్టులు అత్యధికంగా 3,697 ఉండగా, ఏఆర్‌ కానిస్టేబుళ్లు 1,052, ఎస్‌ఏఆర్‌ సీపీఎల్‌ (మెన్‌) 24, స్పెషల్‌ ప్రొటెక్షన్‌ ఫోర్స్‌ (SPF) కానిస్టేబుల్ 1,380, ఫైర్‌ ఫైటర్‌ 751, అలాగే జైలు వార్డర్ పోస్టులు పురుషులకు 196, మహిళలకు 12 చొప్పున కేటాయించారు.

 ఈ పోస్టులకు ఎంపికైన అభ్యర్థులకు నెలకు రూ.24,280 నుంచి రూ.72,850 వరకు ఆకర్షణీయమైన పే స్కేల్ అందనుంది. విద్యార్హతలు మరియు వయోపరిమితి వివరాలకు వస్తే, దరఖాస్తుదారులు 2026 జులై 29 నాటికి ఇంటర్మీడియట్‌ లేదా తత్సమాన పరీక్షలో ఉత్తీర్ణులై ఉండాలి. అంతకంటే ఎక్కువ విద్యార్హత ఉన్నవారు కూడా దరఖాస్తు చేసుకోవడానికి అర్హులు

. అయితే ఫైర్‌ ఫైటర్‌ పోస్టుకు అదనంగా చెల్లుబాటు అయ్యే ఎల్‌ఎంవీ (LMV) డ్రైవింగ్‌ లైసెన్స్‌ ఉండటం తప్పనిసరి. సాధారణంగా అభ్యర్థుల వయస్సు 18 నుంచి 22 సంవత్సరాల మధ్య ఉండాలి. అయితే, యూనిఫామ్‌డ్‌ సర్వీసుల నియామకాల కోసం తెలంగాణ ప్రభుత్వం గరిష్ఠ వయోపరిమితిపై 5 సంవత్సరాల అదనపు సడలింపునిచ్చింది.

 దీనికి తోడు ఎస్సీ, ఎస్టీ, బీసీ, ఈడబ్ల్యూఎస్‌ అభ్యర్థులకు మరో 5 సంవత్సరాల వెసులుబాటు వర్తిస్తుంది. ఎంపిక ప్రక్రియ అత్యంత పారదర్శకంగా పలు దశల్లో జరగనుంది. ముందుగా ప్రిలిమినరీ రాత పరీక్ష నిర్వహిస్తారు. ఇందులో అర్హత సాధించిన వారికి ఫిజికల్‌ మెజర్‌మెంట్‌ టెస్ట్‌ (PMT), ఫిజికల్‌ ఎఫిషియెన్సీ టెస్ట్‌ (PET) ఉంటాయి.

 ఆ తర్వాత తుది రాత పరీక్ష (Final Written Exam) నిర్వహించి మెరిట్ ఆధారంగా అభ్యర్థులను ఎంపిక చేస్తారు. దరఖాస్తు ప్రక్రియ అధికారిక వెబ్‌సైట్ ద్వారా ఆన్‌లైన్‌లో కొనసాగనుంది. ఎస్సీ, ఎస్టీ అభ్యర్థులకు దరఖాస్తు ఫీజు రూ.600గా ఉండగా, మిగిలిన అన్ని వర్గాల వారికి రూ.1,200గా నిర్ణయించారు.

 ఆసక్తి గల అభ్యర్థులు నిర్గత గడువులోగా దరఖాస్తు చేసుకుని ఈ అవకాశాన్ని సద్వినియోగం చేసుకోవాలని బోర్డు సూచించింది.