కృతి సనన్ సంచలన ప్రకటన: 'మిమి' చిత్రం షూటింగ్ సమయంలో తన అండాల ఫ్రీజింగ్!

బాలీవుడ్ అగ్రతార కృతి సనన్ (Kriti Sanon) తన వ్యక్తిగత జీవితానికి సంబంధించి ఓ సంచలన విషయాన్ని వెల్లడించారు. జాతీయ ఉత్తమ నటిగా అవార్డు అందుకున్న 'మిమి' (Mimi) చిత్ర షూటింగ్ సమయంలో తాను తన అండాలను (Eggs) ఫ్రీజింగ్ పద్ధతిలో భద్రపరుచుకున్నట్లు తాజాగా ఓ పాడ్‌కాస్ట్‌లో తెలిపారు. ఈ అనూహ్య నిర్ణయం వెనుక గల కారణాలను ఆమె వివరించారు.

"ఈ విషయాన్ని మొదటిసారి మీతో పంచుకుంటున్నాను. నా అండాలను ఫ్రీజ్ చేసి భద్రపరిచాను" అని కృతి పేర్కొన్నారు. 'మిమి' సినిమా కోసం తాను గణనీయంగా బరువు పెరగాల్సి వచ్చిందని, అందుకు తగ్గ ఆహార పద్ధతులను అనుసరించడంతో కడుపు ఉబ్బరం వంటి సమస్యలు ఎదురయ్యాయని చెప్పారు. బరువు పెరగడమే లక్ష్యంగా పెట్టుకున్న సమయంలో, షూటింగ్ జరుగుతుండగా ఒకరు తనకు ఈ సూచన చేశారని గుర్తు చేసుకున్నారు. "మీరు ఈ పని చేయగలిగితే మీ కోసం మీరు ఇచ్చుకునే అత్యుత్తమ బహుమతి ఇదే అవుతుంది"అని వారు అన్న మాటలు తన మనసులో బలంగా నాటుకుపోయాయని కృతి వెల్లడించారు.

 బరువు పెరిగే ప్రక్రియలో ఉన్నప్పుడే అండాలను భద్రపరచుకోవడానికి ఇదే సరైన సమయమని తనకు అనిపించిందని ఆమె వివరించారు. సాధారణంగా, 'మిమి' వంటి పాత్రల కోసం బరువు పెరగాల్సి వచ్చినప్పుడు లేదా హార్మోన్లకు సంబంధించిన ఇంజెక్షన్లు తీసుకోవాల్సి వచ్చినప్పుడు తాత్కాలిక కడుపు ఉబ్బరం, ఇతర ఆరోగ్య సమస్యలు తలెత్తే అవకాశం ఉంటుంది. బరువు పెరగడం అండాశయం (Ovary) పనితీరుపై ప్రభావం చూపవచ్చని, భవిష్యత్తులో గర్భం దాల్చాల్సి వచ్చినప్పుడు సమస్యలు ఎదురయ్యే ప్రమాదం ఉందని వైద్య నిపుణులు చెబుతారు.

అందుకే, ఆధునిక కాలంలో చాలా మంది మహిళలు అండాలను ఫ్రీజింగ్ పద్ధతి ద్వారా భద్రపరుచుకుంటున్నారు. ఇక, కృతి సనన్‌కు జాతీయ అవార్డు తెచ్చిపెట్టిన 'మిమి' చిత్రం విషయానికొస్తే, తన కలలను నెరవేర్చుకోవడానికి డబ్బు అవసరం కావడంతో మిమి రాథోడ్ అనే యువతి అద్దె గర్భం (Surrogacy) ఇచ్చేందుకు అంగీకరిస్తుంది. అయితే, ఊహించని పరిస్థితుల్లో అమెరికన్ దంపతులు ఆ బిడ్డను స్వీకరించడానికి నిరాకరిస్తారు.

ఈ క్రమంలో పెళ్లి కాకుండా గర్భం దాల్చిన మిమి ఎదుర్కొన్న కష్టాలు, ఆమె తీసుకున్న నిర్ణయాలు ఈ చిత్ర కథాంశం. కృతి సనన్ తీసుకున్న ఈ నిర్ణయం, కెరీర్, వ్యక్తిగత జీవిత సమతుల్యతపై ఆలోచిస్తున్న అనేక మందికి స్ఫూర్తినిస్తుందని సినీ విశ్లేషకులు అభిప్రాయపడుతున్నారు.