ఆంధ్రప్రదేశ్ పబ్లిక్ సర్వీస్ కమిషన్ (APPSC) నిరుద్యోగులకు మరో శుభవార్తను అందించింది. పొల్యూషన్ కంట్రోల్ బోర్డులో ఖాళీగా ఉన్న అసిస్టెంట్ ఎన్విరాన్మెంటల్ ఇంజినీర్ (AEE) ఉద్యోగాల భర్తీకి APPSC అధికారిక నోటిఫికేషన్ విడుదల చేసింది. ఈ నోటిఫికేషన్ ద్వారా మొత్తం 40 AEE పోస్టులను భర్తీ చేయనున్నారు. సంబంధిత విభాగంలో ఇంజినీరింగ్ డిగ్రీ పూర్తి చేసిన అభ్యర్థులు ఈ ఉద్యోగాలకు దరఖాస్తు చేసుకోవడానికి అర్హులు. ఎంపికైన వారికి నెలకు రూ.57,100 నుంచి రూ.1,47,760 వరకు ఆకర్షణీయమైన వేతనం లభించనుంది.
పరీక్షా విధానం, ఎంపిక ప్రక్రియ:
ఈ పోస్టుల ఎంపిక కోసం సింగిల్ లెవెల్ కంప్యూటర్ బేస్డ్ రిక్రూట్మెంట్ టెస్ట్ (CBRT) నిర్వహించనుంది. ఈ పరీక్షలో రెండు పేపర్లు ఉంటాయి. పేపర్-1లో జనరల్ స్టడీస్, మెంటల్ ఎబిలిటీకి సంబంధించిన ప్రశ్నలు, పేపర్-2లో సంబంధిత సబ్జెక్టుకు సంబంధించిన ప్రశ్నలు ఉంటాయి. ప్రతి తప్పు సమాధానానికి 1/3 వంతు నెగెటివ్ మార్కింగ్ విధానం అమలులో ఉంటుంది. ఈ నియామక ప్రక్రియలో స్క్రీనింగ్ టెస్ట్ ఉండదని కమిషన్ స్పష్టం చేసింది. రాత పరీక్షలో మెరిట్ సాధించిన అభ్యర్థులు కంప్యూటర్ ప్రొఫిషియెన్సీ టెస్ట్ (CPT) లో కూడా అర్హత సాధించాల్సి ఉంటుంది.
దరఖాస్తు గడువు:
అర్హత, ఆసక్తి కలిగిన అభ్యర్థులు APPSC అధికారిక వెబ్సైట్ ద్వారా మాత్రమే ఆన్లైన్లో దరఖాస్తు చేసుకోవాలని సూచించారు. ఆన్లైన్ దరఖాస్తు ప్రక్రియ అక్టోబర్ 6, 2026 నుండి ప్రారంభమవుతుంది. దరఖాస్తు దాఖలు చేయడానికి అక్టోబర్ 27, 2026 రాత్రి 11:59 గంటల వరకు గడువు ఇచ్చారు. దరఖాస్తు చేసుకునే ముందు అభ్యర్థులు తమ వయోపరిమితి, ఫీజు, పూర్తి సిలబస్ వంటి వివరాల కోసం అధికారిక నోటిఫికేషన్ను క్షుణ్ణంగా పరిశీలించాలని కమిషన్ కోరింది.
