సైబర్ బాధితులకు గుడ్ న్యూస్.. సులభంగా మీ సొమ్ము రీఫండ్!
సైబర్ నేరగాళ్ల ఉచ్చులో పడి కష్టార్జితాన్ని పోగొట్టుకునే వారి సంఖ్య రోజురోజుకూ పెరుగుతోంది. అయితే, అలా పోగొట్టుకున్న డబ్బును తిరిగి ఎలా పొందాలో తెలియక, పోలీస్ స్టేషన్లు, బ్యాంకులు, కోర్టుల చుట్టూ తిరగలేక ఎంతోమంది బాధితులు మానసిక వేదన అనుభవిస్తున్నారు. ఇలాంటి వారి ఇబ్బందులను తొలగించేందుకు కేంద్ర హోం వ్యవహారాల మంత్రిత్వ శాఖ పరిధిలోని ఇండియన్ సైబర్ క్రైమ్ కో-ఆర్డినేషన్ సెంటర్ (I4C) ఒక అద్భుతమైన మార్గాన్ని అందుబాటులోకి తెచ్చింది.
అదే 'మనీ రిస్టోరేషన్ మాడ్యూల్' (Money Restoration Module - MRM) పోర్టల్. దీని ద్వారా బాధితులు తమ ఇంటి నుంచే ఆన్లైన్ లో రీఫండ్ ప్రక్రియను సులభంగా పూర్తి చేసుకోవచ్చు.
ఎవరు అర్హులు?
సైబర్ మోసానికి గురైన వెంటనే అలసత్వం వహించకుండా 1930 హెల్ప్లైన్ నెంబర్కు ఫోన్ చేసి లేదా నేషనల్ సైబర్ క్రైమ్ రిపోర్టింగ్ పోర్టల్ (NCCRP) వెబ్సైట్లో ఫిర్యాదు చేసిన వారు మాత్రమే ఈ 'MRM' సేవలను ఉపయోగించుకోవడానికి అర్హులు. మీరు ఫిర్యాదు చేసిన వెంటనే అధికారులు స్పందించి, నేరగాళ్ల బ్యాంక్ ఖాతాలను ఫ్రీజ్ (స్తంభింపజేయడం) చేస్తారు. అలా ఫ్రీజ్ అయిన నగదును తిరిగి పొందడానికి ఈ పోర్టల్ ఉపయోగపడుతుంది.
కొత్త నిబంధనలు: ₹50 వేల లోపు ఉంటే కోర్టు ఆర్డర్ అక్కర్లేదు!
సైబర్ క్రైమ్ పోలీసులు తెలిపిన వివరాల ప్రకారం.. ఈ కొత్త విధానంలో బాధితులకు భారీ ఉపశమనం లభించింది.
-
₹50,000 లోపు మొత్తం: ఒకవేళ మీరు పోగొట్టుకున్న మొత్తం ₹50 వేల లోపు ఉండి, నేరగాడి ఖాతాలో ఆ సొమ్ము సక్సెస్ఫుల్గా ఫ్రీజ్ అయి ఉంటే.. బ్యాంకుల సమన్వయంతో ఆ డబ్బును నేరుగా రీఫండ్ చేస్తారు. దీనికోసం ఎలాంటి కోర్టు లేదా పోలీసు ఉత్తర్వులు అవసరం లేదు.
-
₹50,000 పైబడిన మొత్తం: ఒకవేళ పోగొట్టుకున్న సొమ్ము ₹50 వేల కంటే ఎక్కువ ఉంటే మాత్రం.. పోలీసు ఫిర్యాదు, కోర్టు ఉత్తర్వులు సమర్పించాల్సి ఉంటుంది. అవసరమైతే పోలీస్ స్టేషన్లో ధృవీకరణ ప్రక్రియ పూర్తి చేయాలి.
'మనీ రిస్టోరేషన్ మాడ్యూల్ (MRM)' ఎలా పనిచేస్తుంది? (Step-by-Step)
-
లాగిన్ అవ్వండి: సైబర్ నేర బాధితులు తాము ఫిర్యాదు చేసిన సమయంలో ఇచ్చిన మొబైల్ నంబర్ ఆధారంగా MRM పోర్టల్లో లాగిన్ అవ్వాలి.
-
వివరాల నమోదు: మీ వద్ద ఉన్న 14 అంకెల సైబర్ క్రైమ్ ఫిర్యాదు నంబర్ (Acknowledgement Number) ద్వారా ఫిర్యాదు వివరాలను ధృవీకరించాలి.
-
డాక్యుమెంట్ల అప్లోడ్: మోసగాళ్ల బ్యాంక్ ఖాతాలో మీ డబ్బు విజయవంతంగా ఫ్రీజ్ అయి ఉన్నట్లు నిర్ధారించుకున్నాక.. సంబంధిత బ్యాంక్ ఖాతాలను ఎంపిక చేసి, అవసరమైన పత్రాలను అప్లోడ్ చేయాలి.
-
రీఫండ్ అకౌంట్ ఇవ్వడం: ఏ బ్యాంక్ ఖాతాకైతే డబ్బు తిరిగి రావాలో (రీఫండ్ అవ్వాలో) ఆ బ్యాంక్ అకౌంట్ వివరాలను నమోదు చేసి బాండ్ సమర్పించాలి.
-
ట్రాకింగ్ సౌకర్యం: దరఖాస్తు సబ్మిట్ చేసిన తర్వాత ఒక ప్రత్యేక 'ట్రాకింగ్ నంబర్' వస్తుంది. దీని ద్వారా మీ అప్లికేషన్ స్టేటస్ను ఎప్పటికప్పుడు ఆన్లైన్లోనే ఉచితంగా తెలుసుకోవచ్చు.
ముఖ్య గమనిక: సైబర్ మోసానికి గురైన వెంటనే ఎంత త్వరగా ఫిర్యాదు చేస్తే, మీ డబ్బు తిరిగి వచ్చే అవకాశాలు అంత ఎక్కువగా ఉంటాయి. గచ్చిబౌలిలోని సైబరాబాద్ కమిషనరేట్లో బాధితులకు సహాయం చేయడానికి ప్రత్యేక సెల్ను కూడా ఏర్పాటు చేశారు.
నిపుణుల సూచన (Expert Advice)
కె. కరుణాకర్ రెడ్డి (సైబర్ సెక్యూరిటీ ఎక్స్పర్ట్ & లీగల్ అడ్వైజర్): "కేంద్ర ప్రభుత్వం తీసుకొచ్చిన 'మనీ రిస్టోరేషన్ మాడ్యూల్' సైబర్ బాధితులకు ఒక వరప్రసాదం. గతంలో చిన్న మొత్తాల రికవరీ కోసం కూడా కోర్టుల చుట్టూ తిరగాల్సి వచ్చేది, ఇప్పుడు ఆ భారం తప్పింది. అయితే ఇక్కడ కీలకమైనది 'గోల్డెన్ అవర్' (Golden Hour). మోసపోయిన మొదటి 1 నుండి 2 గంటల్లోనే 1930 నెంబర్కు కాల్ చేసి బ్యాంక్ ఖాతాను ఫ్రీజ్ చేయించగలిగితే, ఈ పోర్టల్ ద్వారా 100% డబ్బును సులభంగా వెనక్కి రప్పించుకోవచ్చు."
